Oharrak marjinetan. Gorputzaren inguruan

Mahai ingurua: Mireia Sallarès, Maria Ptqk eta Mercedes Peón. Moderatzailea: Berta Ares Yáñez. 

Proposamen feministak ez dira mugatzen diskurtso bakarrera, baina guztiek partekatzen dute kontakizun hegemonikoaren aurreko desadostasuna eta hura argitzea sustatzen dute. Marjinetako oharrek ideien elkarketa eta ulermena laburbiltzen dute, horiez jabetzea, baina, halaber, desadostasunak eta zuzenketak adierazten dituzte. Sormena abian jartzen dute izateko eta ulertzeko beste modu batzuei lekua egiteko. Hegemonikoaren deseraikuntza iradokitzen dute, eta beste era batera pentsatzeko moduak proposatzen dituzte. 

Mireia Sallarèsek, Maria Ptqkek eta Mercedes Peónek espiritu kritikoa pizten dute beren praktika sortzaile, kuratorial edo artistikoetan oinarrituta, diziplinen elkargunean eta ahotsen, intuizioen eta jakintzen aniztasunean oinarrituta, eta balioa ematen diote irudimenari, aukeraren zentzuari eta inplikazio politikoari.  Horiekin gorputzaren inguruan eztabaidatuko dugu, XXI. mendeko borroka eremu handietako bat baita. 

Genero ikasketek, pentsamendu postkolonialak, jarduera artistikoek eta zientifikoek gorputza eztabaidaren erdigunean jartzen lagundu dute. Ebidentziaren, esperientziaren edo performancearen bitartez, gorputzari buruz pentsatzeak hainbat gai lantzea dakar, besteak beste: zaurgarritasuna, plazera, boterea, indarkeria, autoestimua, beldurra, erresistentzia, sinbiosia, interdependentzia, lankidetza, sexualitatea, kontrasexualitatea, haserrea edo bizikidetasuna.