Gandeia

Gandeiak 2019an sortutako musika proiektu berezi eta berritzailea aurkezten du.  Berezitasun nagusia instrumentu taldea bera da: biolinez, txistu-danbolinez eta pianoz osatutako hirukotea da, eta ziur asko mota horretako musika talde bakarra izango da. Era berean, interprete bakoitzaren musika ibilbidea berezia eta askotarikoa da: Yorrick Troman, egun Nafarroako Orkestra Sinfonikoaren lehen kontzertinoa; Amaia Cordoba, Goi Mailako Piano eta Musikologia tituluduna eta Bigarren Hezkuntzako irakaslea, eta Ion Irazoki, Donostiako Udaleko Txistulari Taldeko kidea. Hiru instrumentu eta ibilbide oso desberdin, baina euskal musikaren errepertorioarekiko interesak elkartuta. GANDEIAren ibilbidean dantzak gero eta garrantzi handiagoa hartu du Oihana Santxotena eta Nahikari Rojo dantzarien lanari esker.