Algecirasen jaio zen, 1968an, eta konpositorea, zuzendaria eta musikologoa da. Espainian, Italian eta Alemanian trebatu zen, eta Zuzenbidean lizentziaduna da UCMn, eta doktorea UAMn. 2001etik, Konposizioan ohorezko katedraduna da Düsseldorfeko Robert-Schumann-Hochschule eskolan, eta 2019tik, Konposizioan katedraduna Madrilgo Goi Mailako Errege Musika Kontserbatorioan. Hainbat urtez irakaslea izan da Dresde, Zaragoza eta Hannoverren, eta hizlari gisa parte hartzeko gonbidatu izan dute Espainia, Alemania, Austria, Italia, Danimarka, Suedia, Finlandia, Peru eta Koreako hainbat erakundek (Sibelius Academy, Mozarteum Salzburg, Municheko Musikhochschulen, Bremen, Nuremberg, Berlin…).
Jaso dituen sarien artean, aipatzekoak dira SGAE Lehiaketako hiru sari (1996 eta 1997), INAEM-Parisko Espainiar Eskolaren Saria (1998), Irino Prize Saria (Tokio, 1998), Siemens-Stiftungen Förderpreis Saria (Munich, 2000), Bergischen Biennaleko Saria (Wuppertal, 2002), Musikako Sari Nazionala (Espainia, 2003), eta Ibn Arabi Saria (2015).
Egonaldiko konpositorea izan da hainbat jaialditan, besteak beste Alemania, Suitza, Austria eta Polonian. Haren obren katalogo zabalak mota askotako lanak biltzen ditu, baina nabarmentzekoak dira orkestra lanak, ganbera musika, proiektu eszeniko ugari eta diziplinarteko lanak; gainera, laneko dramaturgia gisa erabiltzen ditu instalazioak, arkitektura edo argia. Europa osoko jaialdi, opera eta orkestra garrantzitsuenetan aurkeztu dira haren lanak (Deutsche Oper Berlin, Münchener Biennale, Biennale di Venezia, Madrilgo Errege Antzokia, Luzerner Theater, Salzburg Biennale, Musica Viva Munich, Buenos Airesko Colón Antzokia, eta abarretan). Breitkopf & Härtel etxeak argitaratu ditu haren konposizioak.
Argazkia © Zafiro Visual
